මැතිවරණය කඩිනම් කරන්න පක්ෂ නායක රැස්වීමේදී එකඟතාවය

මැතිවරණය කඩිනම් කරන්න පක්ෂ නායක රැස්වීමේදී එකඟතාවය

ඊයේ (27) පැවැති පක්ෂ නායක රැස්වීමේදී ප්‍රධාන තීරණ 03ට පක්ෂ නායකයින්ගේ එකඟතාව පල වු බව නිවේදනයක් නිකුත් කරමින් කථානායක මාධ්‍ය අංශය සඳහන් කළේය.

ඊයේ පෙරවරු 11.30ට පාර්ලිමේන්තු කටයුතු පිළිබඳ කාරක සභාව හෙවත් පක්ෂ නායක රැස්වීම කථානායක කරූ ජයසූරිය මහතාගේ ප්‍රධානත්වයෙන් පවත්වා තිබේ.

මෙම පක්ෂ නායක රැස්වීම සඳහා අග්‍රාමාත්‍ය රනිල් වික්‍රමසිංහ මහතා, පක්ෂ ප්‍රධානීන්, නීතිපතිවරයා මෙන්ම මැතිවරණ කොමිසන් සභාවේ සභාපතිවරයා ද එක්ව සිටි බව අදාල නිවේදනයේ දැක්වෙයි.

ඉදිරි පළාත් පාලන මැතිවරණයට අදාළ වාරණ නියෝගය පිළිබඳව අවධානය යොමු කිරිම සඳහා මෙම රැස්වීම විශේෂ රැස්වීමක් ලෙස පැවැති අතර ඊට විෂය භාර අමාත්‍ය ෆයිසර් මුස්තාෆා මහතා ද එක්ව තිබේ.

මෙම රැස්වීම සඳහා එක් වූ සියලු පාර්ශවයන් ඒකමතිකව අවධාරණය කර ඇත්තේ කිසිදු හේතුවක් මත මැතිවරණය ප්‍රමාදවිමට ඉඩ නොතැබිය යුතු බවයි.

මීට පෙර එකඟ වූ පරිදි ජනවාරි මාසයේදී පළාත් පාලන මැතිවරණය පැවැත්වීමටත් ඉන් අනතුරුව කල්දැමුණු පළාත් සභා මැතිවරණය මාර්තු මාසයේ පැවැත්විමටත් අදහස් කරන බව අග්‍රාමාත්‍ය රනිල් වික්‍රමසිංහ මහතා එහිදී ප්‍රකාශ කර තිබේ.

කෙසේවෙතත් ඊයේ පැවැති සාකච්ඡාවේදී ප්‍රධාන කරුණු 03ක් පිළිබඳව සියලු පාර්ශව එකඟතාවයකට පැමිණි බව කථානායක කාර්යාලය නිවේදනය කළේය.

ඒ අනුව අධිකරණයට කඩිනමින් මෝසමක් ඉදිරිපත් කර අධිකරණ තීරණය ඉක්මනින් ලබා ගැනිම මින් පළමු කරුණ වන අතර හැකි ඉක්මනින් එම පෙත්සම් ඉල්ලා අස්කර ගැනිමට ඇති හැකියාව පිළිබඳ සොයා බැලීම දෙවන කරුණ වෙයි.

එමෙන්ම මෙම ප්‍රවේශයන් දෙකකම අසාර්ථක වුවහොත් 2015 ගැසට් පත්‍ර සීමා උපයෝගි කර ගනිමින් මෙම මැතිවරණය පැවැත්වීමේ හැකියාව සොයා බැලීමට ඊයේ දිනයේ එකඟ වූ කරුණු අතර 03 වන කරුණ වන බව කථානායක කාර්යාලය සඳහන් කළේය.

මේ අතර පළාත් පාලන ආයතනවල සිමා නීර්ණය පිළිබඳ ගැසට් නිවේදනය ක්‍රියාත්මක කිරිම අත්හිටුවමින් තහනම් නියෝගයක් නිකුත් කළ නඩුව මේ මස 30 වනදා යළි කැඳවන්නැයි නිතිපතිවරයා අභියාචනාධිකරණයෙන් ඉල්ලීමක් කර තිබේ.

 





Source From local-news AM
Author:
#SriLanka #News #lka

Powered by WPeMatico