බීච් පාටි ගැන පොලීසිය දැඩි විමසිල්ලෙන්

බීච් පාටි ගැන පොලීසිය දැඩි විමසිල්ලෙන්

විවිධ ආයතන සහ සංවිධාන මඟින් මෙහෙය වන රාත්‍රී වෙරළ සාද සම්බන්ධයෙන් විශේෂ මෙහෙයුමක් සිදු කිරීමට පොලිස් මත්ද්‍රව්‍ය නාශක කාර්යාංශය පියවර ගෙන තිබේ.

පසුගිය දින කිහිපය තුළම දිවයිනේ විවිධ ප්‍රදේශවලින් වෙරළ සාදවල විෂමාචාර සම්බන්ධයෙන් තොරතුරු අනාවරණ වීමත් සමඟ මෙම තීරණය ගෙන ඇත.

මෙම වෙරළ සාද ආශ්‍රිතව විවිධ විෂමචාරයන් සිදුවන අතර, වැඩි වශයෙන් හඳුනා නොගත් මත්ද්‍රව්‍ය එහිදී භාවිතයට ගන්නා බවට ද තොරතුරු අනාවරණ වී තිබේ.

ඊට ආසන්නතම සිදුවීම පෙරේදා වාර්තා වූයේ ගල්කිස්ස ප්‍රදේශයේ වෙරළ තීරයේ සංවිධාන කර තිබූ වෙරළ සාදයක් සම්බන්ධයෙනි.

එහිදී මත්පෙති සහ ගංජා ළඟ තබා ගත් සැකකරුවන් 28 දෙනෙකු අත්අඩංගුවට ගනු ලැබීය.

එමෙන්ම වාද්දුව ප්‍රදේශයේ වෙරළාසන්න හෝටලයක පසුගියදා සංවිධානය කර තිබූ සාදයක් අතරතුරදී ඇති වූ හදිසි රෝගී තත්ත්වයක් හේතුවෙන් පුද්ගලයින් 04 දෙනෙකු ජීවිතක්ෂයට පත්විය.

ඒ අනුව මෙවන් සාදවලට සහභාගිවීමෙන් වළකින ලෙසට පොලිස් මත්ද්‍රව්‍ය නාශක කාර්යාංශය තරුණ තරුණියන්ගෙන් ඉල්ලීමක් කළේය.

ගල්කිස්ස හෝටලයක් පිටුපස පැවැත්වූ වෙරළ සාදයක දී විවිධ මත්ද්‍රව්‍ය භාවිතා කළ බව කියන තරුණ තරුණියන් 30 දෙනෙකුට ආසන්න පිරිසක් අත්අඩංගුවට ගත්බව පොලිසිය කියයි.

අත් අඩංගුවට පත් වූවන් අතර තරුණියන් පස් දෙනෙකු සිටින බව ද පොලිසිය පවසයි.

පොලිස් විශේෂ කාර්ය බළකාය හා ගල්කිස්ස පොලිසිය ඒකාබද්ධව සිදු කරන ලද වැටලීමක දී මෙම පිරිස අත්අඩංගුවට ගෙන ඇත.

මෙම පිරිස සමඟ මත්පෙති, ගංජා, නීතිවිරෝධි දුම්වැටි, මුද්දර නමින් හඳුන්වන මත්ද්‍රව්‍ය විශාල ප‍්‍රමාණයක් මෙම පිරිස සමඟ පොලිසිය බාරයට ගෙන ඇත.

මුහුණුපොත හරහා සංවිධානය කර තිබූ මෙම සාදය සඳහා සහභාගී වීමට රුපියල් දෙදහස් පන්සියයක මුදලක් අය කර ඇත. මෙයට ඇතුල් වීමෙන් පසු විවිධ මත්ද්‍රව්‍ය  මිලදී ගැනීම සඳහා අවශ්‍ය පහසුකම් සලසා තිබූ බව ද පොලිස් නිලධාරියෙක් පැවසීය.

පොලිස් විශේෂ කාර්ය බළකායේ හා ගල්කිස්ස පොලිසියේ නිලධාරීන් වෙස් වළාගෙන සාදයට සහභාගී වී එම වැටලීම කළ බව පොලිස් නිලධාරියෙක් පැවසීය.





Source From local-news AM
Author:
#SriLanka #News #lka

Powered by WPeMatico