ජම්බු ගසෙන් කාන්තාවන් බලෙන්ම පැන්නවීම නිසා සිදුවන ‘ආර්තව දරිද්‍රතාවය’ #SriLanka #LKA

ජම්බු ගසෙන් කාන්තාවන් බලෙන්ම පැන්නවීම  නිසා සිදුවන 'ආර්තව දරිද්‍රතාවය'

පුරුෂ මූලික සමාජ අගතීන් මුල්බැසගෙන ඇති පවුලක් අර්ථයෙන් සලකා බලන විට පවුලේ ගෘහමූලිකයාට සාපේක්ෂව භාර්යාව හා දරුවන් දිළිඳු විය හැකිය. විශේෂයෙන් යම් යම් දේවල්වලට වියදම් කිරීමේදී ප්‍රමුඛතාවක් පැවතීම, එහිදී වෙනත් අවශ්‍යතාවලට වඩා මූලික අවශ්‍යතා ඉටුකර ගැනීමට යාමේදී අනෙකුත් අවශ්‍යතා ප්‍රමුඛතා ලැයිස්තුවෙන් කැපී යාම යනාදිය සිදුවිය හැකිය. සෞඛ්‍ය පහසුකම් ලබාගැනීමේදී, අධ්‍යාපන අවස්ථා ලබාගැනීමේදී, දේපළ බෙදීයාමේදී, ආහාර පාන බෙදීයාමේදී, සමාජ වරප්‍රසාද බෙදීයාමේදී බොහෝවිට පුරුෂයාට ප්‍රමුඛස්ථානයත් කාන්තාවට පුරුෂයාගෙන් පසුව දෙයක් ලබාගැනීමට සිදුවීමත් දකුණු ආසියාව ඇතුළුව ඌන සංවර්ධිත කාණ්ඩයේ සිටන රටවල් හා සමාජවලට පොදු කරුණකි. මේ නිසා බොහෝවිට කාන්තාවන්ට තමන්ගේ මූලික අවශ්‍යතා වශයෙන් ජීවත්වීමට අවශ්‍ය ආහාර ප්‍රමාණය සොයාගැනීමට පවා අරගල කිරීමට සිදුවේ. පුරුෂ මූලික සමාජ ක්‍රම තුළ ස්ත්‍රී පුරුෂ සමාජභාවීය වශයෙන් පවතින වෙනස්කම්, පරතරයන් යනාදිය මගින් කාන්තාවන්ට තමන්ගේ මූලික අවශ්‍යතාවන් පවා ඉටුකර ගැනීමේදී පෝලිමක සිටීමට සිදුවේ. මෙම පෝලිම තුළ ආහාරයට යමක් සොයන කාන්තාවක්, දූෂණයකට ලක්ව තමන්ට සමාජයෙන් සාධාරණයක් සොයන කාන්තාවක්, දූෂණයක් හෝ රැවටීමක් නිසා පියෙකු නොමැති දරුවෙකු කුසෙහි දරාගෙන සිටින කාන්තාවක්, ජීවත්වීමට බැරිම තැන මැදපෙරදිග ගොස් එහිදී ඇණ ගසා, කොණ්ඩ කපා දස වධවලට ලක්වීමෙන් පසුව අමාරුවෙන් තම රටට පැමිණ ජීවිතය සොයන කාන්තාවක්, සැමියාගේ නිරන්තර පහරදීම් අපහාස කිරීම් දරාගැනීමට මඟක් සොයන කාන්තාවක්, වෙනස් ආගමක ඉපදුණු නිසා බලහත්කාරයෙන් ලිංගික අවයව කොටස් කපා චර්ම ඡේදනයට ලක්වූ කාන්තාවක් යනාදී වශයෙන් විවිධ කාන්තාවන් සිටිය හැකිය. පුරුෂයාට හා කාන්තාවට සමාජයෙන් ලබාදී ඇති තත්ත්වය හා කාර්යභාරයන්හි ඇති වෙනස්කම් මගින් ඇතිකරවන පීඩනයෙන් ගැලවෙන මාර්ගයක් සොයන අය විය හැකිය.

ඇය කුමන මට්ටමේ කාන්තාවක් වුවද, කාන්තාවක් වීම නිසාම ඇයට ජීව විද්‍යාත්මක වශයෙන් සිදුවන යම් යම් ස්වභාවික යථාර්ථයන්ට මුහුණපෑමට සිදුවේ. ගැහැණියක් වී ඉපදීමත්, එයට සමාජයෙන් ලබාදී ඇති අඩු තක්සේරුව හා වටිනාකම නිසාත් බොහෝවිට ස්වභාව ධර්මය විසින් ගැහැණියට උරුම කර දී ඇති සමහර ජීව විද්‍යාත්මක දේවල් කරුමයක් වීමටද හැකිය. ගැහැණු දරුවෙකු වී ඉපදීම, දෙමවුපියන් විසින් ගැහැණු දරුවෙකු සමාජානුයෝජනය කරන ආකාරය, මල්වර වීම හෙවත් සරු ගැහැණියක බවට පත්වීම, මාසිකව ඔසප්වීමට ලක්වීම, දූෂණය වීමට හා දූෂණය කිරීමට පහසු ගොදුරක් වීම, ගර්භණී වීම, දරුවන් බිහිකිරීම යනාදිය මගින් ඇයට ඇතිකරවන ස්වභාවික නියමයන් බොහෝවිට ගැහැණියක්ව ඉපදුන නිසා ලැබුන දේවල් වලට වඩා ඒවා මගින් ඇතිකරවන පීඩනකාරී නියමයන් විය හැකිය. මෙම නියමයන් අතර මාසිකව ඔසප්වීමට ලක්වීම හෙවත් ආර්තවය බොහෝ කාන්තාවන්ට පීඩාකාරී ජීව විද්‍යාත්මක නියමයක් මෙන්ම බොහෝවිට සමාජමය වශයෙන් අයට ලබාදී ඇති අවමන් සහගත සැලකීම් නිසා සමාජ විද්‍යාත්මක ගැටළු ගණනාවකට හේතුවක්ද වී ඇත.

ආර්තවය නැතහොත් ඔසප්වීම කාන්තාවකගේ ජීව විද්‍යාත්මක චක්‍රයේ අනිවාර්ය අවස්ථාවක් වේ. ගැහැණු දරුවෙකු මල්වරවීම නැතහොත් දරුවෙකු දැරීමට සුදුසු සරු ගැහැණියක් බවට පත්වීමෙන් පසුව ඇයගේ ජීවිතයේ අවම වශයෙන් වසර තිහක්වත් පමණ කාලයක් තිස්සේ මාසයකට වරක් සිදුවන අනිවාර්ය ජීව විද්‍යාත්මක සංසිද්ධියක් වේ. දරුවෙකු බිහිකිරීමට අවශ්‍ය ඩිම්බ නිෂ්පාදනය, ඩිම්බ මේරීම හා නොමේරු ඩිම්බ පිටකිරීමේ ක්‍රියාවලිය ලෙස සරලව හැඳින්විය හැකි ආර්තවය දින විසි අටක චක්‍රයක් වන අතර කාන්තාවන් විසින් විවිධාකාරයෙන් මුහුණ දෙන තත්ත්වයක් වේ. ජීව විද්‍යාත්මක වශයෙන් බොහෝ කාන්තාවන්ට අධික වේදනාවක් ඇති කරවන මෙම ඩිම්බ පිටකිරීමේ ක්‍රියාවලිය එක් එක් කාන්තාවන්ට දැනෙන ආකාරය අනුව වෙනස් වේ. ගැමි ව්‍යවහාරයේදී මාස් ශුද්ධිය, ඩේට් වෙලා, කිලි දවස්, අමාරු දවස් යනාදී විවිධාකාරයෙන් හඳුන්වන ආර්තව ක්‍රියාවලිය මගින් කාන්තාව කායික වශයෙන් මෙන්ම මානසික වශයෙන්ද පීඩනයට පත්කරවන ක්‍රියාවලියකි.

විශේෂයෙන් යොවුන් වියේ පසුවෙන පාසල් යන දරුවන් ඇතුළු අධ්‍යාපනය ලබන දියණිවරුන්ට බොහෝ වශයෙන් පීඩනයක් ඇතිකරවන කාලයක් ලෙස මෙම ආර්තව කාලය හැඳින්විය හැකිය.ගැහැණියක් වී ඉපදුණු නිසා ජීව විද්‍යාත්මක වශයෙන් සිදුවන මෙම අනිවාර්ය ක්‍රියාවලියෙහි ඇති පීඩනය දෙගුණ තෙගුණ කරවන ආකාරයේ සමාජ පීඩනයක්ද ආර්තවය හා සම්බන්ධව පවතී. ගැහැණු දරුවෙකු මල්වරවීම නැතහොත් වැඩිවියට පැමිණීම ශ්‍රී ලංකාව වැනි රටවල් භාරගන්නා ආකාරය තරමක් වෙනස් වේ. ඇය මිශ්‍ර පාසලක ඉගෙන ගන්නා තැනැත්තියක් නම්, පාසල් කාලයේදී ඇය මල්වර වුවහොත් අනෙකුත් පිරිමි ළමයින්ගේ සම්ච්චලයට භාජනයවීමට ඇයට සිදුවේ. පිරිමි ළමුන්ගේ භාෂාවේදී මල්වරවීම හඳුන්වන්නේ ජම්බු ගහෙන් පැනීම නැතහොත් වැටීම ලෙස වන අතර මූලික ප්‍රජනන සෞඛ්‍ය පිළිබඳ මෙලෝ හසරක් නොදන්නාකම එම වචනය යොදාගැනීමෙන්ම පෙන්නුම් කරයි. මල්වර වීමත් සමග කාන්තාවට සමාජ සංස්කෘතික චාරිත්‍ර සමග අකමැත්තෙන් වුවද සම්බන්ධ වීමට සිදුවේ. මල්වර නැකැත් බැලීම, මල්වර චාරිත්‍ර යනාදිය මගින් දියණියකට ඇති කරවන පීඩනයද, ආර්තව කාල සීමාව තුළදී පුරුෂයින්ට නොදැනෙන නොපෙනෙන ආකාරයට ඇයට ජීවත්වීමට සිදුවීම යනාදිය මගින් ඇතිකරවන පීඩනය සුළුපටු නොවේ. පාසලේදී සුදු ගවුමේ ගෑවී තිබෙන රුධිර පැල්ලමක් දුටු සැනින් ජපන් කොඩිය දාලා නේදැයි සමච්චලයට ලක්කරන ශිෂ්‍යයන් ඔවුන්ගේ මෑණියන්දෑ ද මෙලෙස ජපන් කොඩිය දැමීමේ ස්වභාවික නියමය නිසා තමන් ජාතක කිරීමට හැකි වූ බව දන්නේ නැත.

ආර්තවයත් සමග කාන්තාවගේ එදිනෙදා ක්‍රියාකාරකම් සියල්ල වෙනස් වන්නේ තවමත් ග්‍රාමීය මෙන්ම නාගරික සමාජවලද මාස් ශුද්ධිය යනු ගැහැණුන්ගේ ශරීරයේ තිබෙන ‘ජරාව පිටවීමක්’ ලෙස දකින නිසාය. නොමේරු ඩිම්බ යනු දරුවෙකු පිළිසිඳ ගැනීමේ කාර්යයක් වෙනුවෙන් නිර්මාණය වන දෙයක් වුවද, එම ඩිම්බ සරු වුවහොත් හා ශුක්‍රාණුවක් සමග සංසේචනය වුවහොත් ආදරණීය දරුවෙකු ලෙස භාරගන්නා සමාජයම නොමේරු ඩ්ම්බ ජරාව ලෙස භාරගනිමින් මිනිස්කමටම නිගාදෙනු දැකිය හැකිය. සමාජය කිලි ලෙස සලකන මෙම නොමේරු ඩිම්බ පිටවීම නිසා කාන්තාවන්ට මළ ගෙවල්, විශේෂ උත්සව අවස්ථා යනාදියට තහංචි පැමිණවීමක්ද සිදුවේ. ඇය මාසික ඔසප්වීමට පත්ව ඇත්නම් කාන්තාවන් විසින්ම සහභාගී වන කිරි අම්මාවරුන්ගේ දානවලට පවා සහභාවීමට ඇයට තහංචි පැනවේ. බොහෝ පළාත්වල කාන්තාවන්ගේ ඔසප් දින යනු සැමියාට භාර්යාවගේ අසළටවත් පැමිණීමට නොහැකි තරමේ තහංචි ඇති කරවන කාලසීමාවක්ය. මේ ආකාරයට ආර්තවය මගින් කාන්තාවන්ට ජීව විද්‍යාත්මකව ඇතිකර තිබෙන පීඩනය වඩාත් පුළුල් කරන ආකාරයේ සමාජ සංස්කෘතික රාමුවක් ද සකස් වී තිබේ. සාමාන්‍යයෙන් දින තුනක්- පහක් පමණ අතර කාලසීමාවක පවතින මෙම මාසික ඔසප්වීම කාන්තාවන් විසින් පිරිමින්ගේ ලෝකයෙන් සඟවාගෙන සිටීමට උත්සාහ ගනී.

දෙවනුව කාන්තාවන්ගේ ආර්තව ක්‍රියාවලියේ ස්වභාවය අනුව ඉතා ගණැති ලෙස හෝ තුනී ආකාරයට පිටවෙන පිටවෙන ඩිම්බ රුධිරය වැගිරීමේ ක්‍රියාවලිය නිසා ඇය පීඩනයට පත්වේ. මෙලෙස වෑහෙන ඩිම්බ රුධිරය ශරීරයේ ස්පර්ශවීම වැළැක්වීම සඳහා මෙන්ම ඒවා බැහැර කිරීම සඳහා ඇට උපක්‍රමයක් භාවිත කිරීමට සිදුවේ. අතීත කාලයේදී ඉතා බහුල වශයෙන්ද, වර්තමානයේදී පවා ග්‍රාමීය ප්‍රදේශවලදී මේ සඳහා යොදාගන්නේ රෙදි භාවිතා කිරීමයි. හතරැස් ආකාරයට කපා ගත් රෙදි කැබලි නවා ඒවා යෝනි විවරයෙන් පිටතට පැමිණෙන ඩිම්බ රුධිරය උරාගන්නා ලෙස භාවිතා කිරීමයි. 21 වන සියවසේ ආරම්භයත් සමග සනීපාරක්ෂක තුවා භාවිතයට කාන්තාවන් පුරුදු වූ අතර රෙදි භාවිතයට වඩා පහසු, එමෙන්ම බෑගයක හෝ දමා රැගෙන යාමට හැකිවීම නිසා කාන්තාවන්ට සනීපාරක්ෂක තුවා මගින් ඇති කරන්නේ පහසුවක් ඇති කර තිබේ.

එහෙත් දරිද්‍රතාවය මගින් ඇති කරවන විවිධ පීඩනයන් නිසා සනීපාරක්ෂක තුවා මිලදී ගැනීමට තරම් වත්කමක් නැති, වෙනත් ආකාරයකින් පැවසුවහොත් මූලික ආහාර අවශ්‍යතා යනාදියට ප්‍රමුඛස්ථානය ලබාදීමෙන් පසුව සනීපාරක්ෂක තුවා මිලදී ගැනීම වැනි දෙයක් වෙනුවෙන් මුදල් වියදම් කළ නොහැකි පවුල් විශාල ප්‍රමාණයක් ශ්‍රී ලංකාවේ ජීවත්වෙන බව ඔබ දන්නවාද? සනීපාරක්ෂක තුවායක් මිලදී ගැනීම තබා එවැනි ඒවා තිබෙනවාද යන්න නොදන්නා මිනිසුන් ජීවත්වෙන අතීශය ග්‍රාමීය හා දුෂ්කර ප්‍රදේශ ගැන ඔබ දන්නවාද? සනීපාරක්ෂක තුවා පිළිබඳ බියෙන් හා අවිශ්වාසයෙන් පුරුදු පරිදි රෙදි භාවිතා කරන කාන්තාවන්ද සිටින බව ඔබ දන්නවාද? සනීපාරක්ෂක තුවායක අවශ්‍යතාවය තම පියාට පැවසීමට නොහැකි දියණිවරුන්, තම සැමියාට පැවසීමට නොහැකි භාර්යාවන් සිටින බව ඔබ දන්නවාද? මේ සියල්ල මගින් පැහැදිලි කරන්නේ කාන්තාවකගේ අතිශය ප්‍රාථමික නැතහොත් මූලික අවශ්‍යතාවක් ඉටුකරගැනීමට ඇයට නොහැකියාවක් පැවතීමේ ඛේදවාචකයයි. මෙය දරිද්‍රතාවයේ එක් පැතිකඩක් ලෙස වර්තමානයේදී සමාජ විද්‍යාඥයින් හඳුනාගෙන ඇති ආර්තව දරිද්‍රතාවයයි. සමාජයක් තනන, පරම්පරාවක් බිහිකරන උත්තරීතර ගැහැණුන් විසින් මුහුණ දෙන අතිශය සංවේදී දිළිඳුකමක පැතිකඩයි. මේ නිසා ආර්තව දරිද්‍රතාවයට පිළියම් යෙදීමේ කඩිනම් අවශ්‍යතාවක් දැන් දැන් සමාජයෙන්ම මතුවෙමින් පවතී. ආර්තව දරිද්‍රතාවය හඳුනාගනිමින්, ඒවාට ප්‍රායෝගික විසඳුම් සොයමින් උඩුගම් බලා පිහිණිමට සිදුවී තිබේ. එක් අතකින් පුරුෂ මූලික සමාජ අගතීන්ද, අනෙක් අතින් වාණිජමය වශයෙන් සිදුවෙන සූරාකෑමෙන්ද කාන්තාවන් මුදාගැනීමේ කාලය එළඹ තිබේ. මේ සඳහා සමාජයක් වශයෙන් අපට කළ හැක්කේ කුමක්ද? ඊළග ලිපියෙන් බලාපොරොත්තු වන්න.

– තුෂාර මනෝජ්





Source From lankanewsweb
Author:
#SriLanka #News #lka

Powered by WPeMatico