කූඹියෝ ගැන බොහෝ අය නොදන්න කථාව – පළමු කොටස

                                         ඕනෑම නිර්මාණකරණයකදී නිර්මාණකරුවෙකුට තම නිර්මාණය ගැන යම් යම් තීන්දු තීරණගන්න වෙනවා. යම් නිර්මාණයක් ඒහා බැඳුණු සාමාන්‍ය සාම්ප‍්‍රදාය වෙනස් කරන්නට යන  ඕනෑම විටක නිර්මාණකරුවන් විශාල අවදානමකට පත්වෙනවා. මොකද කියනවා නම් ඒ නිර්මාණය අතිශයින්ම අසාර්ථක නිර්මාණයක් වෙනවා එහෙමත් නැත්නම් අතිශය සාර්ථකත්වයට පත්වෙනවා. ඒක හරියට ඉතුරුවෙලා තියන අන්තිම ගානත් ලොකු ඔට්ටුවකට දානවා වගේ වැඩක්. කොහොම වුණත් ලෝකයේ මේ විිිදිහේ නිර්මාණ, සංකල්පවලට යන්න ගිහින් නැතිබංගස්ථාන වුණු නිර්මාණකරුවන් සහ නිර්මාණ වගේම හිතාගන්නවත් බැරි අවදානමක් අරගෙන කරපු, අවසානයේ ලෝකයේ විශාල පෙරළියක් ඇති කරන්නට හැකි වූ නිර්මාණත් අපට හමුවෙනවා.

අද අපි කියන්න යන කූඹියෝ නාට්‍යත් ලාංකීය ටෙලිකතා ඇතුලේ එවන්ම වූ පෙරළියක් ඇතිකරන්නට සමත් වුණු නිර්මාණයක් කියන කාරණය රහසක් නෙවෙයි. හැමෝම මේ නාට්‍යයේ කතාවේ තිබූ වෙනස් රස හින්දා එහෙමත් නැතිනම් තෝරාගත් නළු නිළියන්ගේ දක්ෂතා නිසාම මේ තත්වයට පත් වුණා කියලයි. හැබැයි කැමරාවෙන් පිටුපස ගැන අවබෝධයක් සහිතව මෙම නිර්මාණය දිහා බැලූවොත් අපිට පේන කාරණාවක් තමයි ඒ කතාවේ රසය සහ හැගීම් ඉස්මතු කිරීමට අපි කලින් කියපු සම්ප‍්‍රදාය ඉක්මවපු ශිල්පීය ක‍්‍රම රැසක් මේ සඳහා යොදා ගෙන ඇති බව. මේ ලිපියෙන් අපි කියන්න යන්නේ කූඹියෝ හිට් වෙන්න බලපෑ එවැනි උපායන් කිහිපයක් ගැන.

 

රංගනයක් නොවූ රඟපෑමක්

 

                        කූඹියෝ තුළ බොහෝ දෙනා අති විශිෂ්ට නිර්මාණයක් ලෙස දකින ප‍්‍රධානතම කාරණය වූයේ එහි නළු නිළියන්ගේ තාත්වික රංගනයයි. නමුත් මෙහි තිර රචනය සහ අධ්‍යක්ෂණය කළ ලක්මාල් ධර්මරත්න මේ සඳහාට වෙනස්ම රංගන මුහුණුවරක් ගෙන ආ යුතු බවට මුල සිටම අදහස් කොට ඇත. කැමරාව ඉදිරියේ රංගන ශිල්පීන්ට රඟපෑම වාරණය කිරිමද ඔහුගේ සැලැස්මකි. චරිත සඳහා නළු නිළියන් තොරා ගැනීමේදී ද වඩා සාධාරණයක් ඉටුකළ හැකි, චරිතය පිළිබඳ අවබෝධක් ඇති රංගනයට බොහෝ ආධුනිකයන් යොදා ගැනීම මෙහි එක් ප‍්‍රතිඵලයකි. ඒ සඳහා ඔහු ඇතැම් රංගන ශිල්පීන් පිටපත ප‍්‍රතික්ෂේප කරන විට පවා ඔවුන් පසුපස ගොස් මේ නාට්‍යයට කැමති කරවා ගත් බව බොහෝ අවස්ථාවලදී ලක්මාල්ම පවසා ඇත.

                                             සරල උදාහරණයක් ලෙස මෙහි මල්දෙණිය නැමැති චරිතයට පණ පොවන්නේ දක්ෂ රංගන ශිල්පියෙකු මෙන්ම තොරතුරු තාක්ෂණ ක්ෂේත‍්‍රයේද ප‍්‍රවීණයෙකු වන පිටර් ද අල්මේදා විසිනි. එ නිසාවෙන්ම ඔහුට එම දේශපාලනික චරිතය අවබෝධයක් ලබාගැනීම සහ එයට තාත්වික රංගනයක් එක් කිරීමටද හැකි විය. ඒ හැරුණු විට මෙම නාට්‍යයේ වාමාංශික පක්ෂ නායකයගේ චරිතයට පණ පොවන පරාක‍්‍රම ජයසිංහ රංගනයට ආධුනිකයෙකු වූවද ඔහු ප‍්‍රවීණ අධ්‍යක්ෂවරයෙකි. නමුත් නාට්‍යයේ ඔහුට ලබා දී ඇත්තේ ප‍්‍රධානතම චරිත කිහිපයකින් එකකි. මෙලෙස ආධුනිකයන් වැඩි වශයෙන් යොදා ගැනීමට හේතුව වශයෙන් ලක්මාල් පෙන්වා දෙනුයේ නාට්‍යය සඳහා බලපෑ මූල්‍ය අඩු පාඩු බවයි.

නමුත් මෙවැනි දැවැන්ත වියදමක් දරා නිෂ්පාදනය කළ නාට්‍යයට ආධුනිකයන් යොදා ගත්තේ වෙනත් යටි අරමුණක්ද සහිතව බැව් හොඳින් බැලූවොත් පෙනී යන කාරණයකි. බොහො ජනප‍්‍රිය විවිධ නිර්මාණවල විවිධ චරිත ඔස්සේ අපට හමුවන නළු නිළියන් වෙනුවට පේ‍්‍රක්ෂකයාට නැවුම් පිරිසක් මෙම නාට්‍යයට යොදා ගැනීම තුළ ඔහුගේ මෙම නිර්මාණයේ නැවුම් බව ඉස්මතු කිරීමට සමත් වුණි. ඇතැම් විට මෙම පිරිස අප වෙනත් නිර්මාණ ඔස්සේ ඉදිරියේදි දුටුවහොත් නිතැතින්ම අප මනසට නැගෙනුයේ මෙම නාට්‍යය තුළ ඔවුන් කළ භූමිකාව බව පැහැදිලිය.

කූඹියෝ imageකූඹියෝ image

 

දර්ශන රාමු නිර්ණය ක‍්‍රමවේදය

 

කූඹියෝ image

දර්ශන රාමු නිර්ණය කිරීම ඉතා ගැඹුරු විෂයක් වූවත් ලංකාවේ වාණිජමය පදනම් තුළ නිර්මාණය කෙරෙන මෙගා ටෙලිවලින් අපට එතරම් දෙයක් දැකිය නොහැකිය. සතියේ දවස් පහේ දුවන නාට්‍යයට පිටපත් රචකයා ලියා දෙන ලියා දෙන කොටස කැමරාවට ගෙන හැකි ඉක්මනින් සංස්කරණය කර සම්පුර්ණ කිරීමට  අධ්‍යක්ෂවරයා ඇතුළු කාර්ය මණ්ඩලය දඟලනුයේ හරියට රත් වූ හැලියේ සිටින කකුළුවන් මෙනි. නමුත් අපි ජාත්‍යන්තර ටෙලි කතා මාලාවක් හෝ චිත‍්‍රපටයක් දෙස බැලූවොත් ඒවා නිර්මාණය වන්නේ බොහෝ කල් ගතවීමෙන් අනතුරුවයි. ඒ ඔවුන් මේ දර්ශන රාමු සැකසීම වැනි සියුම් කාරණා ගැන පවා සංවේදීව බලන නිසාවෙනි. බොහෝ දෙනා ඒ තරම් මේ පිළිබඳ තැකීමක් නොකළත් සැබැවින්ම හැගීම් සහ සංවේදනාවන් රූප තිරයක් ඔස්සේ පේ‍්‍රක්ෂකයාට ලබා දීමට මේ කාරණා සුවිශේෂි දායකත්වයක් ලබා දේ.

මෑත කාලීනව ලාංකේය සිනමා නිර්මාණයක මෙවැනි දක්ෂ රාමු නිර්ණයක් සිදුකළේ නම් ඒ ආලෝකෝ උදපාදි චිත‍්‍රපටයයි. නමුත් ටෙලි කතා මාලාවක් තුළ ලාංකේය පේ‍්‍රක්ෂකයා මෙම අත්දැකීම ලබන්නේ පළමු වරට කුඹියෝ ඔස්සේයි. ඇතැම් විට ඒ ආලෝකෝ උදපාදී අධ්‍යක්ෂණය කළ චත‍්‍ර වීරමන් සහ මෙහි සංස්කරණය සහ අධ්‍යක්ෂණයට සහය වූ දමිත චන්ද්‍රසිරි සිනමාකරණය පිළිබඳව ජාත්‍යන්තරව හදාරා තිබීමත් සහ අත්දැකීම් තිබීම නිසාත් වන්නට පුළුවන. කෙසේ වෙතත් මෙහි පිටපත අනූව ක‍්‍රියාදාම ටෙලි නාට්‍යක් ලෙස සාර්ථක කරවීමට, ඉතා සාර්ථක වූ ජාත්‍යන්තර ටෙලි කතා මාලා වන Breaking Bad, Sherlock, Black Mirror  වැනි නිර්මාණ තුළ තිබූ ගුණාංග එකතුකර ගැනීමට අධ්‍යක්ෂවරයා විශාල උත්සහයක් ගෙන ඇති බැව් පෙනෙන්නට තිබේ.

Rack Focus Technique

මෙය ප්‍රෙක්ෂකයාගේ අවධානය යොමු කර විය යුතු වස්තු හෝ පුද්ගලයන් ගේ දර්ශන සඳහා යොදාගන්නා රාමු සැකැස්මකි. ජාත්‍යන්තර සිනමාවවේ නිතර හමු වූවත් ලාංකේය ටෙලි කථා මාලා තුළ මෙවැනි දර්ශන දැකිය හැක්කේ අල්ප වශයෙනි. මෙහිදි පසුතලය අපැහැදිලි වන ලෙස කැමරාව අදාළ වස්තුවට හෝ පුද්ගලයාට පමණක් කැමරාව නාභිගත කරයි.

කූඹියෝ imageකූඹියෝ image

Low Angle Shots

මෙහිදී දර්ශනය ගන්නා විට කැමරාව රංගන ශිල්පියාගේ ඇස්මට්ටමට වඩා පහළ ස්ථානයක තබයි. මෙවැනි දර්ශන යොදාගනු ලබන්නේ අදාළ පුද්ගලයාගේ ශක්තිමත් බව බලවත් බව හෝ පෞරුෂය විදහා පෑමටයි. මෙයද දර්ශන රාමු තුළින් හැ`ගීම් ඉස්මතු කිරීමේ සියුම් ශිල්පීය ක‍්‍රමයකි.

කූඹියෝ imageකූඹියෝ image

High Angle Shots

මෙහිදී සිදුකෙරෙන්නේ අප Low Angle Shots වලදී භාවිත කළ ක‍්‍රමවේදයේ පරස් පර ක‍්‍රමවේදයයි. මෙය යම් චරිතයක ඇති දුර්වල බව, බියගුලූ බව දැක්වීම සඳහා ලෝක සිනමාවේ භාවිත කෙරෙයි. ඔබ කවුරුත් දන්නා lord of the rings කතා මාලාව වැනි සුවිශේෂී නිර්මාණ බිහිකළ පීටර් ජැක්සන් නැමැති අධ්‍යක්ෂකවරයා මෙම රාමු නිර්ණය පිළිබඳව බොහෝ සෙයින්ම සංවේදී වූ පුද්ගලයෙකි. කුඹියෝ නාට්‍යයේ වූවද මේ පිළිබඳ වඩා උනන්දුවක් දැක්වා ඇති බව පෙනෙන්නට තිබේ.

කූඹියෝ image

Freeze-Frame Shots

මෙය තවත් සුවිශේෂී දර්ශන ක‍්‍රමවේදයක්. මෙහිදී පසුබිමෙහි ඇති සෑම දෙයක්ම නිශ්චලව තබා දර්ශනයේ ප‍්‍රධාන චරිතයට පමණක් චලනය වීමට ඉඩ සලසයි. නමුත් මෙම කර්තව්‍ය තනි කැමරාකරුට කළ හැක්කක් නොවෙයි. මෙය සංකීර්ණ දර්ශන ක‍්‍රමවේදයක් මේ සඳහා දක්ෂ සංස්කරණ ශිල්පියෙක් සහ ආලෝකකරණ ශිල්පියෙකුත් සිටිය යුතුයි. මෙවැනි දර්ශන මගින් ප්‍රෙක්ෂකයාට වෙනස්ම වූ අත්දැකීමක් සහ ඔවුන් දර්ශනය තුළට මොහොතකට ගෙන යෑමට උපකාරි වෙයි. බොහො ජනප‍්‍රිය Matrix චිත‍්‍රපටවල සහ Sherlock කතා මාලාවේත් මෙවැනි දර්ශන නිතර හමුවේ.

කුඹියෝ ටෙලි නාට්‍යය තුළත් එක් තැනක මෙවැනි දර්ශනයක් ඇතුලත් කිරීමට තරම් නිර්භීත වී තිබුණා. නමුත් මේ සඳහා යොදා ගත් ක‍්‍රමවේදය නම් සම්පූර්ණ වෙනස්. සාමාන්‍යයෙන් මෙවැනි දර්ශන ගැනීමේදි එකම ස්ථානයේ විවිධ වූ ආකාරයට ලබාගන්නා දර්ශන සංස්කරණයේදී එකට එළීමෙන් තනි දර්ශනයක් බවට පත් කරනවා. අවශ්‍ය නම් ත‍්‍රිමාණ සජීවිකරණයකුත් යොදාගන්නවා. නමුත් කුඹියෝ තුළ නම් ඇත්තේ තනි කැමරා දර්ශනයක් පමණයි. එහිදි අන් අය නොසෙල්වා තබා ගනිමින් Freeze-Frame Shot එකක් නිර්මාණය කිරීමට ඔවුන් උත්සහ කර තිබෙනවා. කොහොම වුණත් සිනමාකරණය ගැන අධ්‍යනය නොකළ පේ‍්‍රක්ෂකයෙකුට නම් මෙම දර්ශන දෙක පිළිබඳ ලොකු වෙනසක් දකින්නේ නැහැ.

කූඹියෝ image    කූඹියෝ image

Freeze-Frame shots    “ Kumbiyo”  Vs     “Sherlock”

*******************************************************

කූඹියෝ තුළ අඩංගු වූ තවත් මෙවැනි ශිල්පීය ක‍්‍රමය ගණනාවක් තියනවා. අපි ඉදිරි දවසක මීළඟ ලිපිය ඔස්සේ කූඹියෝ හැඩගැන්වූ තවත් කැමරාකරණ ශිල්පීය ක‍්‍රම, ආලෝකකරණය, දෘෂ්‍ය ප‍්‍රයෝග(VFX)  ගැන කියන්න සුදානම් 

-written by Dhanushka Sanjaya-

The post කූඹියෝ ගැන බොහෝ අය නොදන්න කථාව – පළමු කොටස appeared first on TechWire.





Source From techwire
Author: Dhanushka Sanjaya
#SriLanka #News #lka

Powered by WPeMatico